شگر محکمہ جنگلات شگر نے موسم بہار شجرکاری مہم کا باقاعدہ آغاز
رپورٹ، 5 سی این نیوز
شگر محکمہ جنگلات شگر نے موسم بہار شجرکاری مہم کا باقاعدہ آغاز کر دیا۔ ڈپٹی کمشنر شگر عارف حسین اور کنزرویٹر جنگلات بلتستان ڈویژن خادم عباس نے پودے لگاکر مہم کا افتتاح کردیا۔ افتتاحی تقریب ماڈل ہائی سکول شگر میں منعقد ہوئی جہاں ڈپٹی کمشنر شگر عارف حسین اور کنزرویٹر بلتستان خادم عباس نے پودے لگا کر مہم کا افتتاح کیا۔ اس موقع پر منعقدہ تقریب سے ڈپٹی کمشنر شگر عارف حسین، کنزرویٹر بلتستان خادم عباس اور پرنسپل ماڈل ہائی سکول شگر فیض محمد نے خطاب کیا۔ڈپٹی کمشنر شگر عارف حسین نے اپنے خطاب میں کہا کہ شجرکاری وقت کی اہم ترین ضرورت ہے۔ درخت لگانا نہ صرف سنت ہے بلکہ صدقہ جاریہ بھی ہے۔ انہوں نے کہا کہ درخت قدرتی آفات کے نقصانات کو کم کرنے میں اہم کردار ادا کرتے ہیں، جبکہ ضلعی انتظامیہ محکمہ جنگلات کے ساتھ مکمل تعاون کرے گی اور جنگلات کے فروغ کے لیے ہر ممکن اقدامات کیے جائیں گے۔ کنزرویٹر بلتستان خادم عباس نے خطاب کرتے ہوئے کہا کہ پودوں کی بقا دراصل انسان کی بقا کی ضمانت ہے۔انہوں نے کہا کہ بلتستان ریجن میں قدرتی جنگلات نہ ہونے کے برابر ہیں، جس کی وجہ سے ماحولیاتی مسائل میں اضافہ ہو رہا ہے۔ انہوں نے بتایا کہ ایک بڑے شجرکاری منصوبے کے تحت بلتستان میں ساڑھے آٹھ لاکھ پودے لگائے جائیں گے۔ انہوں نے کہا کہ شگر ایک فاریسٹ لینڈ ہے اور یہاں زیادہ سے زیادہ شجرکاری کی جا رہی ہے۔زمینداروں پر زور دیا گیا کہ وہ پودوں کی حفاظت کو یقینی بنائیں کیونکہ بڑھتی آبادی کے باعث جنگلات پر دباؤ بڑھ رہا ہے، جو سیلاب جیسے خطرات کا سبب بن سکتا ہے۔ انہوں نے کہا کہ پودا لگانا آسان ہے مگر اس کی دیکھ بھال ایک مشکل مرحلہ ہے، اس لیے عوامی تعاون ناگزیر ہے۔
پرنسپل ماڈل ہائی سکول شگر فیض محمد نے کہا کہ طلبہ میں شجرکاری کے حوالے سے شعور اجاگر کرنا وقت کی اہم ضرورت ہے۔ درخت نہ صرف ماحول کو خوبصورت بناتے ہیں بلکہ انسانی زندگی کے لیے بھی ناگزیر ہیں۔ انہوں نے طلبہ پر زور دیا کہ وہ زیادہ سے زیادہ پودے لگانے کے ساتھ ساتھ ان کی حفاظت کو بھی یقینی بنائیں۔انہوں نے کہا کہ تعلیمی ادارے مثبت سرگرمیوں کے فروغ میں کلیدی کردار ادا کرتے ہیں اور شجرکاری مہم میں سکول کے طلبہ بڑھ چڑھ کر حصہ لیں گے۔تقریب کے اختتام پر محکمہ جنگلات اور ضلعی انتظامیہ کی کاوشوں کو سراہتے ہوئے اس عزم کا اظہار کیا گیا کہ مہم کو کامیاب بنایا جائے گا۔
urdu news update tree Plantation Campaign
61 ہجری کا کربلا اور آج کا کربلا . ایک حسینی کردار اور ایک یزید کردار . محمد ابرہیم نوری
نرگسیت۔خود پسندی سے خود فریبی تک. یاسمین اختر طوبیٰ ریسرچ اسکالر گوجرہ، پاکستان
