گلگت اہلسنت علما اور عمائدین کا جامعہ امامیہ مسجد کا تاریخی دورہ، اسلام آباد دھماکے کی مذمت
رپورٹ، 5 سی این نیوز
گلگت اہلسنت علما اور عمائدین کا جامعہ امامیہ مسجد کا تاریخی دورہ، اسلام آباد دھماکے کی مذمت
گلگت میں فرقہ وارانہ ہم آہنگی اور بین المسالک اتحاد کو فروغ دینے کے لیے ایک اہم اور خوش آئند پیش رفت سامنے آئی ہے۔ اہلسنت کے جید علما کرام اور عمائدینِ شہر پر مشتمل ایک باوقار وفد نے جامعہ امامیہ مسجد کا دورہ کیا۔
وفد کی قیادت مولانا خلیل احمد قاسمی کر رہے تھے، جنہوں نے جامعہ امامیہ کے امام جمعہ و الجماعت آغا راحت حسین سے ملاقات کی۔ ملاقات کے دوران ملک کی موجودہ صورتحال، بالخصوص اسلام آباد میں حالیہ دھماکے کے افسوسناک واقعے پر تفصیلی تبادلہ خیال کیا گیا۔
اہلسنت علما نے اسلام آباد دھماکے کی شدید الفاظ میں مذمت کرتے ہوئے قیمتی انسانی جانوں کے ضیاع پر گہرے رنج و غم کا اظہار کیا۔ انہوں نے شہدا کے لواحقین سے دلی تعزیت اور ہمدردی کا اظہار کرتے ہوئے کہا کہ معصوم انسانوں کا قتل کسی بھی مذہب، مسلک یا اخلاقی اصول کے تحت جائز قرار نہیں دیا جا سکتا۔
مولانا خلیل احمد قاسمی کا کہنا تھا کہ ایسے واقعات پوری قوم کے لیے سانحہ ہوتے ہیں اور ہمیں بطور علما اور رہنما معاشرے میں امن، برداشت اور بھائی چارے کا پیغام عام کرنا ہوگا۔
اس موقع پر آغا راحت حسین نے بھی وفد کی آمد کو خوش آئند قرار دیتے ہوئے کہا کہ گلگت بلتستان ہمیشہ سے بین المسالک ہم آہنگی کی مثال رہا ہے، اور موجودہ حالات میں اتحاد و اتفاق کی مزید ضرورت ہے۔
دونوں مکاتبِ فکر کے علما نے اس عزم کا اعادہ کیا کہ فرقہ وارانہ ہم آہنگی، رواداری اور پائیدار امن کے قیام کے لیے مشترکہ کاوشیں جاری رکھی جائیں گی۔
شہر کے عوام کی جانب سے اس دورے کو نیک شگون قرار دیا جا رہا ہے، اور امید ظاہر کی جا رہی ہے کہ اس اقدام سے گلگت میں امن و امان کی فضا مزید مستحکم ہوگی۔

Thank you for reading this post, don't forget to subscribe!

urdu news update Sunni Scholars

شگر میں ڈوگرو، نیاسلو اور ہمیسل کے مابین واقع متنازعہ مائننگ ایریاز ہوپا داس اور گوری کھا کے حوالے سے انتظامیہ متحرک ہو گئی۔

داستانِ عشق بہ نامِ پیا : شبِ ویلنٹائن تھی. یاسمین اختر طوبیٰ ریسرچ اسکالر گوجرہ، پاکستان

ویلنٹائن ڈے: اخلاقی اقدار کا قاتل. سلیم خان