شگر رمضان میں عوام کو سہولیات کی فراہمی یقینی بنانے کے لیے انتظامیہ متحرک، ہیڈکوارٹر بازار میں قیمتوں اور صفائی کا تفصیلی جائزہ،
رپورٹ، 5 سی این نیوز
شگر رمضان میں عوام کو سہولیات کی فراہمی یقینی بنانے کے لیے انتظامیہ متحرک، ہیڈکوارٹر بازار میں قیمتوں اور صفائی کا تفصیلی جائزہ، ماہِ رمضان المبارک کے دوران عوام کو سہولیات کی فراہمی اور اشیائے خوردونوش کی قیمتوں کو کنٹرول میں رکھنے کے لیے ضلعی انتظامیہ شگر نے ہیڈکوارٹر بازار میں کارروائی کرتے ہوئے قیمتوں اور صفائی کی صورتحال کا تفصیلی جائزہ لیا۔ تحصیلدار ہیڈکوارٹر قاضی ممتاز کی ہمراہی میں حلقہ پٹواری بازار کا دورہ کیا گیا، جس کے دوران مختلف دکانوں پر روزمرہ استعمال کی اشیاء کی دستیابی، مقررہ سرکاری نرخوں پر فروخت، معیارِ خوراک اور صفائی و ستھرائی کے انتظامات کا باریک بینی سے معائنہ کیا گیا۔ انتظامی ٹیم نے دکانوں میں آویزاں ریٹ لسٹوں، اشیائے خوردونوش کی ایکسپائری تاریخ، اسٹوریج کے طریقہ کار، اشیاء کی مناسب نمائش اور مجموعی صفائی کی صورتحال کا تفصیلی جائزہ لیا۔ اس موقع پر دکانداروں کو سختی سے ہدایت کی گئی کہ وہ سرکاری نرخ نامے نمایاں طور پر آویزاں رکھیں اور مقررہ قیمتوں سے تجاوز نہ کریں تاکہ عوام کو کسی قسم کی پریشانی کا سامنا نہ کرنا پڑے۔ معائنے کے دوران بعض دکانوں پر صفائی کے ناقص انتظامات، ریٹ لسٹ کی عدم موجودگی اور دیگر انتظامی امور میں کوتاہی پائی گئی، جس پر متعلقہ دکانداروں کو موقع پر ہی تنبیہ کرتے ہوئے فوری اصلاحی اقدامات کی ہدایات جاری کی گئیں۔ خلاف ورزی کے مرتکب افراد کو سخت وارننگ دی گئی اور واضح کیا گیا کہ آئندہ سرکاری احکامات، نرخ نامے اور صفائی کے قواعد کی خلاف ورزی کی صورت میں قانونی کارروائی عمل میں لائی جائے گی۔ تحصیلدار قاضی ممتاز نے اس موقع پر کہا کہ رمضان المبارک میں عوام کو معیاری اور مقررہ نرخوں پر اشیائے ضروریہ کی فراہمی انتظامیہ کی اولین ترجیح ہے اور کسی قسم کی غفلت یا ناجائز منافع خوری ہرگز برداشت نہیں کی جائے گی۔ انہوں نے مزید کہا کہ بازاروں کی باقاعدہ مانیٹرنگ کا عمل جاری رہے گا تاکہ عوام کو ریلیف فراہم کیا جا سکے اور قیمتوں میں استحکام یقینی بنایا جا سکے۔
urdu news update Shigar Administration
