شگر جامع مسجد امامیہ شگر میں شہید رہبرِ معظم سید علی خامنہ ایؒ کو خراجِ تحسین پیش کرنے اور ان کے بلندیٔ درجات کے لیے فاتحہ خوانی، قرآن خوانی اور مجلسِ ترحیم کا انعقاد کیا گیا
شگر جامع مسجد امامیہ شگر میں شہید رہبرِ معظم سید علی خامنہ ایؒ کو خراجِ تحسین پیش کرنے اور ان کے بلندیٔ درجات کے لیے فاتحہ خوانی، قرآن خوانی اور مجلسِ ترحیم کا انعقاد کیا گیا جس میں ہزاروں افراد نے شرکت کی۔ نمازِ جمعہ کے خطبے اور مجلس سے خطاب کرتے ہوئے امام جمعہ جامع مسجد امامیہ شگر سید طہٰ الموسوی اور نائب امام جمعہ شیخ نثار مہدی حیدری نے کہا کہ شہید رہبرِ معظم سید علی خامنہ ایؒ اس صدی کے عظیم رہنماؤں میں شمار ہوتے تھے جنہوں نے ظلم و استکبار کے سامنے جھکنے کے بجائے ہمیشہ حق اور انصاف کا علم بلند رکھا۔ انہوں نے کہا کہ رہبرِ معظم نے اپنی پوری زندگی امتِ مسلمہ کی بیداری، مظلوموں کی حمایت اور عالمی استکباری قوتوں کے خلاف جدوجہد میں صرف کی اور آخرکار اسی راستے میں اپنی جان کا نذرانہ پیش کیا۔ مقررین نے کہا کہ شہید رہبرِ معظم کی جدوجہد اور افکار عالم اسلام کے لیے مشعلِ راہ ہیں اور ان کی شہادت امت مسلمہ کے لیے صبر، استقامت اور بیداری کا پیغام ہے۔ انہوں نے گلگت بلتستان کی انتظامیہ اور صوبائی حکومت سے مطالبہ کیا کہ حالیہ واقعات میں نوجوانوں کے خونِ ناحق پر انصاف فراہم کیا جائے۔ مقررین کا کہنا تھا کہ اگر انصاف کے بجائے نوجوانوں کو گرفتار کرنے کی کوشش کی گئی تو اس سے عوام میں مزید بے چینی پیدا ہوگی۔تقریب کے اختتام پر شہید رہبرِ معظم سید علی خامنہ ایؒ کے ایصالِ ثواب، ملک پاکستان کی سلامتی اور استحکام، پاک فوج کی کامیابی اور عالم اسلام کے اتحاد و یکجہتی کے لیے خصوصی دعائیں بھی کی گئیں۔
urdu news update Qur’an recitation
