شگر ملک بھر کی طرح ضلع شگر میں بھی 23 مارچ یومِ پاکستان قومی جذبے اور جوش و خروش کے ساتھ منایا گیا
رپورٹ. عابدش گ
شگر ملک بھر کی طرح ضلع شگر میں بھی 23 مارچ یومِ پاکستان قومی جذبے اور جوش و خروش کے ساتھ منایا گیا۔ اس سلسلے میں اسسٹنٹ کمشنر آفس شگر میں ایک پروقار تقریب منعقد ہوئی، جس میں سرکاری افسران، علمائے کرام، سیاسی رہنماؤں، میڈیا نمائندگان اور عوام کی بڑی تعداد نے شرکت کی۔ سابق صوبائی وزیر راجہ محمد اعظم خان اور ڈپٹی کمشنر شگر عارف حسین نے پرچم کشائی کی ۔ اس موقع پر ڈسٹرکٹ پولیس کے چاق و چوبند دستے نے سلامی پیش کی جبکہ قومی ترانے کی دھن سے فضا گونج اٹھی اور شرکاء میں حب الوطنی کا جذبہ مزید اجاگر ہوا۔ تقریب سے خطاب کرتے ہوئے ڈپٹی کمشنر عارف حسین، سابق وزیر راجہ اعظم خان اور پرنسپل محمود عالم نے کہا کہ یومِ پاکستان تجدیدِ عہد کا دن ہے جو ہمیں اسلاف کی عظیم قربانیوں کی یاد دلاتا ہے۔ انہوں نے کہا کہ 23 مارچ ہماری قومی تاریخ کا اہم سنگ میل ہے جب برصغیر کے مسلمانوں نے قائداعظم محمد علی جناح کی قیادت میں ایک آزاد وطن کے قیام کا عزم کیا۔ مقررین کا کہنا تھا کہ قراردادِ پاکستان ایک طویل آئینی اور اصولی جدوجہد کا نتیجہ ہے، جس کے ثمرات کی صورت میں ہمیں ایک آزاد مملکت نصیب ہوئی جہاں ہر شہری کو مذہبی، سیاسی اور فکری آزادی حاصل ہے۔ انہوں نے مزید کہا کہ پاکستان کے دشمن ملک کو عدم استحکام کا شکار بنانے کی سازشوں میں مصروف ہیں، جنہیں ناکام بنانا ہم سب کی مشترکہ ذمہ داری ہے۔ خصوصاً سوشل میڈیا کے ذریعے امن، اتحاد اور بھائی چارے کو فروغ دیتے ہوئے ملک کے استحکام اور تعمیر و ترقی کے لیے ہر فرد کو اپنا کردار ادا کرنا ہوگا۔ آخر میں ملکی سلامتی، ترقی اور خوشحالی کے لیے خصوصی دعائیں کی گئیں۔
urdu news update Pakistan Day Celebrated with National Spirit
خودکشی کے بڑھتے ہوئے واقعات اور وجوہات . یاسر دانیال صابری
