گلاب پور اور وزیر پور میں بدترین لوڈشیڈنگ، انسانی حقوق کی خلاف ورزی کے مترادف
رپورٹ، 5 سی این نیوز
گلاب پور اور وزیر پور میں بدترین لوڈشیڈنگ، انسانی حقوق کی خلاف ورزی کے مترادف
ضلع شگر کے علاقوں گلاب پور اور وزیر پور میں جاری بدترین اور غیر اعلانیہ لوڈشیڈنگ پر انٹرنیشنل ہیومن رائٹس موومنٹ گلگت بلتستان نے شدید تشویش کا اظہار کیا ہے۔ بجلی کی طویل بندش کے باعث عوام کو سخت مشکلات کا سامنا ہے جبکہ معمولاتِ زندگی بری طرح متاثر ہو رہے ہیں۔
گھریلو صارفین، طلبہ، بزرگ شہریوں اور مریضوں کو شدید پریشانی لاحق ہے۔ بجلی کی عدم دستیابی کے باعث پانی کی فراہمی، گھریلو امور اور چھوٹے کاروبار متاثر ہو رہے ہیں۔ موجودہ سرد موسم میں ہیٹنگ سسٹم اور دیگر ضروری برقی آلات کی بندش نے صورتحال کو مزید گھمبیر بنا دیا ہے۔
انٹرنیشنل ہیومن رائٹس موومنٹ گلگت بلتستان کے میڈیا کوآرڈینیٹر ضلع شگر، ذوالفقار زلفی نے اپنے بیان میں کہا ہے کہ بجلی جیسی بنیادی سہولت کی مسلسل بندش شہریوں کے بنیادی انسانی حقوق کی خلاف ورزی کے مترادف ہے۔ انہوں نے متعلقہ حکام اور ذمہ دار اداروں سے مطالبہ کیا ہے کہ فوری نوٹس لیتے ہوئے لوڈشیڈنگ کے مسئلے کا مستقل اور مؤثر حل نکالا جائے اور بجلی کی بلا تعطل فراہمی یقینی بنائی جائے۔
انہوں نے مزید کہا کہ اگر عوامی مشکلات کا فوری ازالہ نہ کیا گیا تو شہریوں میں بے چینی میں اضافہ ہوگا، جس کی تمام تر ذمہ داری متعلقہ اداروں پر عائد ہوگی۔
urdu news update Load Shedding in Gulabpur
سیونگ اکاؤنٹس میں کتنی رقم پر زکوٰۃ کٹے گی؟ رواں سال کا نصاب جاری
