گلگت: اشکومن پریمیئر لیگ سیزن فائیو کے انعقاد کے لیے اہم ملاقات
رپورٹ، 5 سی این نیوز
گلگت: اشکومن پریمیئر لیگ سیزن فائیو کے انعقاد کے لیے اہم ملاقات
اشکومن پریمیئر لیگ (آئی پی ایل) سیزن فائیو کے وفد نے صدر نعیم انور کی قیادت میں چیف کورٹ گلگت بلتستان کے جسٹس راجہ شکیل احمد سے ان کے چیمبر میں ملاقات کی۔
ملاقات کے دوران وفد نے آئی پی ایل سیزن 5 کے انعقاد کے حوالے سے تفصیلی گفتگو کی اور حسبِ روایت ایونٹ کے کامیاب انعقاد کے لیے تعاون کی درخواست کی۔
اس موقع پر جسٹس راجہ شکیل احمد نے اشکومن کے سب سے بڑے سپورٹس ایونٹ کو سراہتے ہوئے کہا کہ نوجوانوں کے لیے صحت مند سرگرمیوں کا فروغ ایک مثبت قدم ہے، اور ایسے اقدامات کی بھرپور حوصلہ افزائی کی جانی چاہیے۔ انہوں نے یقین دہانی کرائی کہ اس ایونٹ کے لیے ہر ممکن تعاون اور مدد فراہم کی جائے گی۔
وفد کی جانب سے صدر آئی پی ایل نعیم انور نے جسٹس راجہ شکیل احمد کا شکریہ ادا کرتے ہوئے کہا کہ وہ علاقے کے ایک مخلص اور قابلِ فخر فرزند ہیں، جنہوں نے گزشتہ چار برسوں سے اس میگا ایونٹ کی کامیابی میں کلیدی کردار ادا کیا ہے۔ انہوں نے کہا کہ اپنی عدالتی مصروفیات کے باوجود جسٹس صاحب ہمیشہ انتظامیہ کے ساتھ بھرپور تعاون کرتے رہے ہیں اور ایونٹ کی کامیابی کے لیے اخلاقی و مالی معاونت فراہم کرتے آئے ہیں۔
انہوں نے مزید کہا کہ علاقے کے نوجوان اور فٹبال کے شائقین جسٹس راجہ شکیل احمد کی خدمات پر انہیں خراجِ تحسین پیش کرتے ہیں۔
یاد رہے کہ جسٹس راجہ شکیل احمد نے ہر سال کی طرح اس سال بھی اشکومن پریمیئر لیگ سیزن فائیو کے لیے نقد رقم بطور عطیہ فراہم کی اور مکمل تعاون کی یقین دہانی کرائی۔
urdu news update Ishkoman Premier League Season Five
