فیلڈ مارشل سید عاصم منیر کے ساتھ علما کی ملاقات, جو کلمات ادا کیے گئے، وہ نہ صرف غیر مناسب بلکہ انتہائی افسوسناک ہیں گفتگو علما کی توہین کے مترادف ہے۔ شیخ محمد حسن جعفری
حالیہ دنوں میں فیلڈ مارشل سید عاصم منیر کے ساتھ علما کی ملاقات کے دوران جو لہجہ اختیار کیا گیا اور جو کلمات ادا کیے گئے، وہ نہ صرف غیر مناسب بلکہ انتہائی افسوسناک ہیں۔ ایسے الفاظ کسی بھی طرح ایک ذمہ دار اور اعلیٰ منصب پر فائز شخصیت کے شایانِ شان نہیں ہو سکتے۔
یہ حقیقت ہے کہ جب کوئی فرد اس قدر بڑے عہدے پر فائز ہو، تو اس کے الفاظ صرف الفاظ نہیں رہتے بلکہ وہ پورے معاشرے پر اثر انداز ہوتے ہیں۔ اس لیے اس نوعیت کی گفتگو نہ صرف علما کی توہین کے مترادف سمجھی جائے گی بلکہ اس سے ملتِ تشیع اور قومی اداروں کے درمیان ایک غیر ضروری خلیج پیدا ہونے کا خطرہ بھی ہے،اور اس کی ذمہ داری بھی اسی سطح پر عائد ہوتی ہے جہاں سے یہ لہجہ اختیار کیا گیا۔
ہم واضح کرنا چاہتے ہیں کہ کسی بھی طبقے، بالخصوص علما اور ملتِ تشیع کے ساتھ اس انداز میں گفتگو ناقابلِ قبول ہے۔ یہ رویہ نہ صرف دل آزاری کا باعث بنتا ہے بلکہ ملک کے اندر اتحاد و یکجہتی کو بھی نقصان پہنچاتا ہے۔
اسی طرح یہ کہنا کہ اگر کسی کو ایران سے ہمدردی ہے تو وہ وہاں چلا جائے،یہ جملہ انتہائی غیر سنجیدہ اور غیر ذمہ دارانہ ہے۔ اپنے عقائد، اپنے مقدسات اور کسی بھی مظلوم کے ساتھ ہمدردی رکھنا نہ کوئی جرم ہے اور نہ ہی اس کی بنیاد پر کسی کی حب الوطنی پر سوال اٹھایا جا سکتا ہے۔ یہ ملک کسی ایک سوچ یا ایک نقطۂ نظر کی جاگیر نہیں بلکہ ہم سب کا مشترکہ وطن ہے۔اور یہی پیغام یوم پاکستان ۲۳ مارچ کو مینارِ پاکستان پر متفقہ طور پر دیا گیا تھا اور آج ہم اسی عظیم دن کی یاد منا رہے ہیں۔
ہم یہ بھی یاد دلانا ضروری سمجھتے ہیں کہ پاکستان کے قیام سے لے کر آج تک ملتِ تشیع نے ہر محاذ پر اس ملک کے لیے قربانیاں دی ہیں،چاہے وہ دفاع ہو، سیاست ہو یا سماجی میدان۔ہم نے ۱۹۴۸ میں گلگت بلتستان کو ڈوگرا راج سے لڑھ کر آزاد کروا کر پاکستان میں شامل کروایا اور اس مملکت خداداد کیلئے ہر وقت دشمن کے سامنے سیسا پلائی دیوار بنے۔
لہٰذا ہم یہ سمجھتے ہیں کہ اس معاملے پر فوری طور پر وضاحت اور معذرت سامنے آنی چاہیے تاکہ پیدا ہونے والی بے چینی ختم ہو اور کسی بھی قسم کی غلط فہمی کو جڑ سے ختم کیا جا سکے۔
مزید برآں، ایک نہایت اہم نکتہ کی جانب توجہ مبذول کرانا ضروری سمجھتے ہیں کہ وفاقی سطح پر جو جے آئی ٹی تشکیل دی گئی ہے، اس کی کوئی ضرورت نہیں تھی، کیونکہ اس معاملے پر پہلے ہی انجمن امامیہ کے مطالبات کی روشنی میں جوڈیشل کمیشن قائم کیا جا چکا تھا۔ ایسے میں ایک اور متوازی فورم کھڑا کرنا نہ صرف غیر ضروری ہے بلکہ اس سے شکوک و شبہات بھی جنم لیتے ہیں۔
اگر واقعی امن و امان کو برقرار رکھنا اور معاملات کو درست سمت میں لے جانا مقصود ہے، تو ضروری ہے کہ جوڈیشل کمیشن کی تحقیقات کو مکمل کیا جائے، اس کی رپورٹ کو شفاف انداز میں سامنے لایا جائے، اور عوام کو اعتماد میں لیا جائے۔ اس کے ساتھ ساتھ انجمن امامیہ کی جانب سے پیش کردہ چارٹر آف ڈیمانڈ پر سو فیصد عمل درآمد کیا جانا چاہیے، تاکہ حقیقی معنوں میں انصاف ہوتا ہوا نظر آئے اور اعتماد بحال ہو۔
ہم اپنی بات پوری ذمہ داری کے ساتھ، مگر پوری دوٹوک انداز میں رکھتے ہیں:
احترام دو طرفہ ہوتا ہے، اور اگر قومی یکجہتی مطلوب ہے تو اس کی ابتدا بھی باوقار اور مہذب گفتگو سے ہی ہوگی۔
والسلام
شیخ محمد حسن جعفری
urdu news update Inappropriate and Disrespectful
شگر ملک بھر کی طرح ضلع شگر میں بھی 23 مارچ یومِ پاکستان قومی جذبے اور جوش و خروش کے ساتھ منایا گیا
خودکشی کے بڑھتے ہوئے واقعات اور وجوہات . یاسر دانیال صابری
