ضلع شگر میں تاریخی عظمتِ شہداء کانفرنس کا انعقاد، تمام مکاتبِ فکر سے تعلق رکھنے والے علما کرام، عمائدین اور عوام نے ہزاروں کی تعداد میں شرکت
رپورٹ، 5 سی این نیوز
ضلع شگر میں تاریخی عظمتِ شہداء کانفرنس کا انعقاد کیا گیا، جس میں تمام مکاتبِ فکر سے تعلق رکھنے والے علما کرام، عمائدین اور عوام نے ہزاروں کی تعداد میں شرکت کر کے اسے ایک کامیاب اور یادگار اجتماع بنا دیا۔ تفصیلات کے مطابق انجمن امامیہ شگر کے زیرِ اہتمام مرکزی جامع مسجد اثنا عشری شگر خاص میں کانفرنس منعقد ہوئی۔ اس موقع پر مختلف مسالک کے علما اور نمائندگان نے خطاب کیا۔ کانفرنس کے مہمانِ خصوصی آغا باقر الحسینی تھے، جبکہ دیگر مقررین میں شیخ زاہد حسین زاہدی، سید محمد سعید الموسوی، آغا طہ الموسوی، مولوی عبداللہ (اہلحدیث) اور مفتی علی محمد ہادی (مسلک نوربخشی) شامل تھے۔ مہمانِ خصوصی آغا باقر الحسینی نے اپنے خطاب میں شہداء کو زبردست خراجِ عقیدت پیش کرتے ہوئے کہا کہ قوم اپنی وحدت، بصیرت اور شعور کے ذریعے ہر سازش کو ناکام بنا سکتی ہے۔ انہوں نے واضح کیا کہ ریاستی اداروں سے کوئی دشمنی نہیں، تاہم بعض واقعات پر تحفظات موجود ہیں جن کی شفاف تحقیقات ناگزیر ہیں۔ انہوں نے احتجاج کے دوران پیش آنے والے واقعات اور املاک کو نقصان پہنچانے کے ذمہ دار عناصر کے تعین پر بھی سوالات اٹھائے۔ انجمن امامیہ سکردو کے سینئر نائب صدر شیخ زاہد حسین زاہدی نے کہا کہ شگر کی سرزمین پر ہونے والا یہ عظیم اجتماع دیگر علاقوں کے لیے ایک مثال ہے۔ انہوں نے زور دیا کہ عوام اور علما کے اتحاد سے ہی امن و امان برقرار رکھا جا سکتا ہے، جبکہ بعض اداروں کی غفلت کے باعث قیمتی جانوں کے ضیاع کا سنجیدگی سے نوٹس لیا جانا چاہیے۔ معروف عالمِ دین سید محمد سعید الموسوی نے نوجوانوں کو تلقین کی کہ وہ اپنے جذبات کو علما کی قیادت کے تابع رکھیں اور معاشرے میں امن کے قیام کے لیے مثبت کردار ادا کریں۔ انہوں نے کہا کہ اسلام انسانوں کے جان و مال کے تحفظ کا درس دیتا ہے، جس پر عمل وقت کی اہم ضرورت ہے۔ استقبالیہ خطاب کرتے ہوئے امام جمعہ جامع مسجد اثنا عشری شگر خاص آغا طہ الموسوی نے تمام مکاتبِ فکر کے علما کا شکریہ ادا کیا اور کہا کہ شگر کے عوام نے مثالی اتحاد کا مظاہرہ کیا ہے۔ انہوں نے بتایا کہ فورس کمانڈر کو علاقے کے مسائل سے آگاہ کیا گیا ہے اور ان کے حل کے لیے مثبت پیش رفت کی امید ہے۔ دیگر مقررین نے بھی شہداء کی قربانیوں کو خراجِ تحسین پیش کرتے ہوئے امتِ مسلمہ کے اتحاد، امن اور بھائی چارے کو فروغ دینے پر زور دیا۔ کانفرنس کے اختتام پر ملک و ملت کی سلامتی، شہداء کے درجات کی بلندی اور قومی یکجہتی کے لیے خصوصی دعا کی گئی۔
urdu news update Historic Martyrs
