اسلامی تحریک میں کسی بھی سطح پر اختلاف کی خبریں بے بنیاد اور من گھڑت قرار، شبیر میثمی
رپورٹ، 5 سی این نیوز
اسلامی تحریک میں کسی بھی سطح پر اختلاف کی خبریں بے بنیاد اور من گھڑت قرار، ذاتی ایجنڈے پر مبنی منفی رپورٹنگ صحافتی اصولوں کے خلاف ہے، علامہ شبیر میثمی.
اسلام آباد اسلامی تحریک پاکستان کے مرکزی سیکرٹری جنرل علامہ ڈاکٹر شبیر حسن میثمی نے اپنے ایک بیان میں کہا ہے کہ گلگت بلتستان میں عام انتخابات کے قریب آتے ہی بعض عناصر کی جانب سے ایک مخصوص سیاسی جماعت کو نشانہ بناکر رپورٹنگ کرنا صحافتی اصولوں اور اخلاقی اقدار کے منافی ہے۔ ایک ذمہ دار صحافی ہمیشہ اپنی غیر جانبداری کو ذاتی پسند و ناپسند پر ترجیح دیتا ہے اور حق و حقیقت کے ساتھ کھڑا رہنا ہی حقیقی اصول پسندی کہلاتا ہے۔ اسلامی تحریک پاکستان اور خصوصاً اسلامی تحریک گلگت بلتستان میں کسی بھی سطح پر کوئی اختلاف موجود نہیں ہے۔ ہمارے مرکزی، صوبائی، ضلعی، تحصیل اور یونٹ سطح کے تمام عہدیداران و کارکنان تسبیح کے دانوں کی طرح باہم متحد ہیں اور قائد ملت جعفریہ پاکستان علامہ سید ساجد علی نقوی کی مدبرانہ و حکیمانہ قیادت میں ایک منظم اکائی کی صورت کام کر رہے ہیں۔انہوں نے کہا ہے کہ ہمارے کارکنان ہی پارٹی کا اصل سرمایہ اور حقیقی وارث ہیں، جنہوں نے ہمیشہ ہر مشکل گھڑی میں قیادت کے ہر حکم پر لبیک کہتے ہوئے تحریک کو کامیابیوں سے ہمکنار کیا۔ لہٰذا پارٹی کے اندر انتشار یا اختلافات سے متعلق من گھڑت اور بے بنیاد خبریں دراصل مخصوص ذاتی ایجنڈے کی عکاس ہیں، جو کسی اصول پسند صحافی کے شایانِ شان نہیں۔ ہم تمام صحافتی اداروں اور ذمہ داران سے اپیل کرتے ہیں کہ ایسی بے بنیاد اور منفی خبروں کے نشر و اشاعت سے گریز کریں اور اصولی صحافت کی روایت کو مزید مضبوط بنائیں۔ اختلافِ رائے ہر منظم جماعت کے اندر ایک فطری خوبصورتی ہے اور اسلامی تحریک پاکستان میں بھی تمام فیصلے باہمی مشاورت، اتفاقِ رائے اور وسیع تر قومی و ملی مفاد کو مدنظر رکھ کر کیے جاتے ہیں۔
urdu news update, gilgit baltistan news
شگر میں بجلی کی فراہمی کا نظام بظاہر فعال نظر آتا ہے، لیکن اصل مسئلہ کم وولٹیج کا ہے
