گلگت بلتستان: مفت سولر اسکیم کا ڈراپ سین، عوام میں تشویش
سکردو رپورٹ مہدی اکمل
گلگت بلتستان میں حکومت کی جانب سے اعلان کردہ مفت سولر اسکیم کے حوالے سے نئی صورتحال سامنے آگئی ہے جس پر عوامی حلقوں میں تشویش پائی جا رہی ہے۔ ابتدا میں اس اسکیم کو وزیر اعظم کی جانب سے مکمل طور پر مفت قرار دیا گیا تھا اور عوام کو بتایا گیا تھا کہ انہیں بغیر کسی معاوضے کے سولر پینلز فراہم کیے جائیں گے۔
تاہم اب اطلاعات کے مطابق اس اسکیم کو قرعہ اندازی سے مشروط کر دیا گیا ہے۔ ذرائع کے مطابق قرعہ اندازی کے بعد کامیاب امیدواروں سے ٹرانسپورٹ اخراجات کے نام پر فی سولر پینل تقریباً چار ہزار روپے وصول کیے جانے کا امکان ظاہر کیا جا رہا ہے۔
عوامی حلقوں کا کہنا ہے کہ پہلے اسکیم کو مکمل طور پر مفت قرار دیا گیا، مگر اب اس میں مختلف شرائط شامل کی جا رہی ہیں جس سے لوگوں میں مایوسی پھیل رہی ہے۔ شہریوں نے مطالبہ کیا ہے کہ حکومت اس معاملے کی وضاحت کرے اور اگر یہ اسکیم واقعی مفت ہے تو کسی بھی قسم کی فیس یا اضافی اخراجات نہ لیے جائیں۔
دوسری جانب شہریوں کا کہنا ہے کہ موجودہ مہنگائی کے دور میں بجلی کے متبادل ذرائع کے لیے سولر اسکیم عوام کے لیے ایک بڑی سہولت ثابت ہو سکتی ہے، اس لیے ضروری ہے کہ اس پروگرام کو شفاف اور واضح طریقے سے نافذ کیا جائے۔
Urdu news update Gilgit baltistan news
