شگر علمائے شگر نے رہبرِ معظم انقلابِ اسلامی سید علی خامنہ ای کی افسوسناک شہادت پر ضلع شگر میں دس روزہ سوگ کا اعلان کر دیا
رپورٹ ۔ عابد شگری 5 سی این نیوز
شگر علمائے شگر نے رہبرِ معظم انقلابِ اسلامی سید علی خامنہ ای کی افسوسناک شہادت پر ضلع شگر میں دس روزہ سوگ کا اعلان کر دیا۔ اعلان کے ساتھ ہی ضلع بھر میں غم و غصے کی لہر دوڑ گئی اور شگر کے گوشہ و کنار سے عوام گھروں سے نکل آئے۔ مظاہرین منظم ریلی کی صورت میں حسینی چوک شگر پہنچے جہاں ریلی ایک بڑے احتجاجی جلسے میں تبدیل ہو گئی۔ جلسے میں علماء کرام کی قیادت میں بھرپور احتجاج ریکارڈ کرایا گیا اور شرکاء نے نعرے بازی کرتے ہوئے اپنے جذبات کا اظہار کیا۔احتجاجی جلسے سے خطاب کرتے ہوئے آغا سعید الموسوی ، سید عباس الموسوی ، سید طہ الموسوی ، شیخ شکور ، شیخ اشرف حسین ، سید محمد عراقی ، سید محسن الموسوی اور دیگر علماء کرام نے کہا کہ ہمیں چودہ سو سال قبل امام حسینؑ کی قربانی سے استقامت اور مزاحمت کا درس ملا تھا اور آج ایک بار پھر اسی پیغام کو دہرانے کی ضرورت ہے۔ انہوں نے کہا کہ رہبر کو شہید کرنے کے باوجود استکباری قوتیں اپنے مذموم مقاصد میں کامیاب نہیں ہوں گی بلکہ ان کے خون سے تحریک مزید مضبوط ہو گی۔ ان کا کہنا تھا کہ رہبرِ معظم نے اپنے رب سے کیے گئے عہد کو نبھاتے ہوئے شہادت قبول کی مگر باطل قوتوں کے سامنے سر نہیں جھکایا۔ انہوں نے حکومتِ پاکستان سے مطالبہ کیا کہ وہ اس معاملے پر واضح مؤقف اختیار کرے اور امتِ مسلمہ کو وحدت کا مظاہرہ کرنا چاہیے۔
جلسے سے خطاب کرتے ہوئے مقررین کا کہنا تھا کہ مسلم امہ ایک عظیم شخصیت سے محروم ہو گئی ہے۔ انہوں نے کہا کہ موجودہ حالات میں امت کی ذمہ داریاں مزید بڑھ گئی ہیں اور ہمیں ہوشیاری، بصیرت اور اتحاد کے ساتھ آگے بڑھنا ہوگا۔ انہوں نے دعویٰ کیا کہ عالمی قوتوں کی نظریں خطے کے وسائل پر ہیں اور نوجوان نسل کے افکار کو متاثر کرنے کی کوششیں کی جا رہی ہیں، جس کے پیش نظر اساتذہ اور سماجی حلقوں کو اپنا کردار ادا کرنا ہوگا۔ مقررین نے کہا کہ امت کو بصیرت کے ساتھ حالات کا مقابلہ کرنا ہوگا اور اسلام کے تحفظ کے لیے متحد ہونا ہوگا۔ انہوں نے کراچی اور سکردو کے حالیہ واقعات کی بھی مذمت کی۔ جلسے کے اختتام پر مقررین نے اعلان کیا کہ مزاحمت کا مشن جاری رکھا جائے گا اور رہبرِ معظم کے افکار کو آگے بڑھایا جائے گا۔ دس روزہ سوگ کے دوران ضلع شگر میں مختلف مذہبی و سماجی سرگرمیوں کو محدود رکھنے کا بھی اعلان کیا گیا۔
Urdu news update Gilgit baltistan news