یوم پاکستان 23 مارچ کے موقع پر ڈویژنل کمپلیکس سکردو میں خواتین کی ایک پروقار تقریب
رپورٹ، 5 سی این نیوز
یوم پاکستان 23 مارچ کے موقع پر ڈویژنل کمپلیکس سکردو میں خواتین کی ایک پروقار تقریب مشیر برائے بہبودِ آبادی و ترقیِ نسواں، سیدہ فاطمہ موسوی کی زیرِ صدارت منعقد ہوئی۔ تقریب کا مقصد وطنِ عزیز پاکستان سے محبت، اس کی سلامتی اور استحکام کے لیے عزمِ نو کی تجدید کرنا تھا۔ تقریب سے خطاب کرتے ہوئے سیدہ فاطمہ موسوی نے کہا کہ 23 مارچ کا دن تجدیدِ عہد اور شکر گزاری کا دن ہے۔ انہوں نے کہا کہ پاکستان ہماری پہچان اور ہماری شناخت ہے، اور اس کی حفاظت ہم سب پر فرض ہے۔ انہوں نے مزید کہا کہ وطن سے محبت ایمان کا حصہ ہے، لہٰذا ملک کی سلامتی اور استحکام کے لیے مشترکہ کوششیں وقت کی اہم ضرورت ہیں۔
دیگر مقررین نے اپنے خیالات کا اظہار کرتے ہوئے کہا کہ پاکستان بے شمار نعمتوں سے مالامال ملک ہے اور اس کی بقا و سلامتی ہم سب کی ذمہ داری ہے۔ انہوں نے اس عزم کا اظہار کیا کہ بطور پاکستانی خواتین، ملک کی ترقی، استحکام اور سالمیت کے لیے اپنا بھرپور کردار ادا کریں گی۔ مقررین نے اس بات پر بھی زور دیا کہ محمد علی جناح کے سنہری اصولوں، ایمان، اتحاد اور تنظیم پر عمل پیرا ہو کر ہی ہم ایک مضبوط اور مستحکم پاکستان کی بنیاد رکھ سکتے ہیں۔
تقریب میں طالبات نے ملی نغمے پیش کیے، جنہیں شرکاء نے بے حد سراہا۔ اس موقع پر یومِ پاکستان کی اہمیت کو اجاگر کرتے ہوئے اس عزم کا اعادہ کیا گیا کہ ہم اپنے اسلاف کی قربانیوں کی میراث کو آگے بڑھاتے ہوئے پاکستان کی ترقی اور خوشحالی کے لیے بھرپور کردار ادا کریں گے۔
urdu news update Dignified Women’s Ceremony
