شگر کوتھنگ پائین میں عوامی تعاون سے تعمیر ہونے والا روڈ مکمل، ڈپٹی کمشنر شگر عارف حسین اور اسسٹنٹ کمشنر فیصل حیات گوندل نے افتتاح کر دیا
رپورٹ، 5 سی این نیوز
شگر( عابد شگری ) کوتھنگ پائین میں عوامی تعاون سے تعمیر ہونے والا روڈ مکمل، ڈپٹی کمشنر شگر عارف حسین اور اسسٹنٹ کمشنر فیصل حیات گوندل نے افتتاح کر دیا۔کوتھنگ پائین (ضلع شگر) میں عوام کی جانب سے اپنی مدد آپ کے تحت تعمیر کیے جانے والے رابطہ سڑک کی تکمیل کے بعد افتتاحی تقریب منعقد ہوئی۔ تقریب میں ڈپٹی کمشنر شگر عارف حسین اور اسسٹنٹ کمشنر شگر فیصل حیات گوندل نے باقاعدہ طور پر روڈ کا افتتاح کیا۔ اس موقع پر علاقے کے عمائدین، معززین اور عوام کی بڑی تعداد موجود تھی۔ ڈپٹی کمشنر شگر عارف حسین نے عوامی تعاون اور یکجہتی کو سراہتے ہوئے کہا کہ ترقیاتی کاموں میں عوام کی شمولیت قابلِ تقلید مثال ہے۔ انہوں نے یقین دہانی کرائی کہ ضلعی انتظامیہ کی جانب سے علاقے کی ترقی کے لیے ہر ممکن تعاون جاری رکھا جائے گا۔ ڈپٹی کمشنر شگر نے اس موقع پر علاقے کے پرانے روڈ کو دوبارہ قابلِ استعمال بنانے کے لیے بھی اقدامات کرنے کا اعلان کیا، جس سے عوام کو آمد و رفت میں مزید سہولت میسر آئے گی۔ اسسٹنٹ کمشنر شگر فیصل حیات گوندل نے کہا کہ عوامی سطح پر کیے جانے والے ایسے منصوبے نہ صرف وسائل کی بچت کا باعث بنتے ہیں بلکہ باہمی تعاون اور اتحاد کو بھی فروغ دیتے ہیں۔
علاقہ مکینوں نے ضلعی انتظامیہ کا شکریہ ادا کرتے ہوئے امید ظاہر کی کہ مستقبل میں بھی اسی طرح عوامی مسائل کے حل کے لیے عملی اقدامات کیے جائیں گے۔
urdu news, gilgit baltistan news,
شگر کے سیاستدانوں کی کارکردگی ، ای ایس ڈی شگری
