ایجوکیشن ریفارم کمیٹی کا اہم اجلاس، طلبہ کو ایک اور موقع فراہم کرنے کا فیصلہ 3 مضامین میں فیل طلبہ و طالبات کیلئے خوشخبری

ایجوکیشن ریفارم کمیٹی کا اہم اجلاس، طلبہ کو ایک اور موقع فراہم کرنے کا فیصلہ 3 مضامین میں فیل طلبہ و طالبات کیلئے خوشخبری
رپورٹ 5 سی این نیوز
گلگت بلتستان کے وزیر اعلیٰ حاجی گلبرخان کی سربراہی میں آج ایجوکیشن ریفارم کمیٹی کا ایک اہم اجلاس منعقد ہوا۔ اس اجلاس میں وزیر تعلیم گلگت بلتستان غلام شہزاد آغا، ڈائریکٹر جنرل سکولز ایجوکیشن گلگت بلتستان فیض اللہ خان لون، ڈائریکٹر ایجوکیشن گلگت ریجن سید نبی شاہ، اور دیگر اعلیٰ افسران نے شرکت کی۔
اجلاس کے دوران تعلیمی نظام میں بہتری اور طلبہ کو بہتر مواقع فراہم کرنے کے لیے اہم فیصلے کیے گئے۔ وزیر اعلیٰ گلگت بلتستان کی ہدایت پر بورڈ آف ایلمنٹری ایجوکیشن گلگت بلتستان کے تحت کلاس پنجم اور ہشتم کے سالانہ امتحانات میں تین مضامین میں فیل ہونے والے طلبہ کو دوبارہ موقع دینے کا فیصلہ کیا گیا ہے۔ ان طلبہ کو ایک ماہ کے اندر دوبارہ امتحانات دینے کا موقع دیا جائے گا۔
وزیر اعلیٰ حاجی گلبرخان نے اس موقع پر کہا کہ تعلیم ہماری ترقی کی بنیاد ہے، اور ہر طالب علم کو مواقع فراہم کرنا ہماری ذمہ داری ہے۔ انہوں نے کہا کہ یہ فیصلہ طلبہ کی تعلیمی کامیابی کو یقینی بنانے اور انہیں حوصلہ دینے کے لیے اٹھایا گیا ہے۔
وزیر تعلیم گلگت بلتستان غلام شہزاد آغا نے کہا کہ یہ اقدام طلبہ کی تعلیمی صلاحیتوں کو بہتر بنانے اور انہیں دوبارہ کوشش کرنے کا موقع فراہم کرے گا۔ انہوں نے اس بات پر زور دیا کہ تعلیمی اداروں کو طلبہ کی بہتر رہنمائی اور تیاری کے لیے ہر ممکن اقدامات کرنے چاہئیں۔
ڈائریکٹر جنرل سکولز ایجوکیشن فیض اللہ خان لون نے کہا کہ اس فیصلے سے نہ صرف طلبہ کو فائدہ ہوگا بلکہ تعلیمی معیار کو بہتر بنانے میں بھی مدد ملے گی۔ انہوں نے کہا کہ تمام متعلقہ افسران کو اس عمل کو موثر اور شفاف طریقے سے مکمل کرنے کی ہدایت کی گئی ہے۔
یہ فیصلہ گلگت بلتستان کی تعلیمی پالیسی میں ایک اہم قدم ہے، جس سے طلبہ کو نئے مواقع فراہم کرنے اور ان کی تعلیمی کامیابی کو یقینی بنانے میں مدد ملے گی۔
Urdu news, Education Reform Committee