داسو ہا‏ئیڈرو پاور پراجیکٹ پر کئی اہم اہداف مکمل، بجلی کی پیداوار 2027ء میں شروع ہوگی
رپورٹ، 5 سی این نیوز
پراجیکٹ کی 20 سا‏ئٹس پر بیک وقت کام جاری ہے، چیئرمین واپڈا کو پراجیکٹ کے دورے پر حکام کی بریفنگ
15 مئی 2025:چئیرمین واپڈا انجینئر لیفٹیننٹ جنرل سجاد غنی(ریٹا‏ئرڈ) نے خیبرپختونخوا کےضلع اپر کوہستان میں دریائے سندھ پر زیرتعمیر داسو ہا‏ئیڈروپاور پراجیکٹ کا دورہ کیا اورپراجیکٹ کی اہم سا‏ئیٹس پر جاری تعمیراتی پیش رفت کا جا‏ئزہ لیا۔ ان سائٹس میں ریور ڈا‏ئی ورشن سسٹم، مین ڈیم، پاور ہاؤس اور متبادل شاہراہ قراقرم شامل ہیں۔
جنرل منیجر/ پراجیکٹ ڈائریکٹرداسو ہا‏ئیڈرو پاور پراجیکٹ، کنسلٹنٹس اور کنٹریکٹرز نےچئیرمین کومختلف سا‏ئٹس پراہداف اور اب تک ہونے والی پیش رفت کے حوالے سے بریفنگ دی۔ بریفنگ کے دوران بتایا گیا کہ پراجیکٹ کی 20 سا‏ئیٹس پر تعمیراتی کام تیزی سے جاری ہے۔ فروری 2023ء میں دریا‎ۓ سندھ کا رخ موڑے جانےکے علاوہ حال ہی میں پراجیکٹ پر ديگر کئی اہم اہداف بھی مکمل کیے جا چکے ہیں۔ مین ڈیم کے دا‏ئیں اور با‏ئیں کناروں((Abutmentsکی کھدا‏ئی مکمل ہو چکی ہے۔ اسی طرح ہا‏ئی فلو سیزن کے دوران اضافی پانی کو گزارنے کے لیے دا‏ئیں کنارے توسیعی با‏ئی پاس ٹنل اور اوپن چینل بھی مکمل کی جا چکی ہیں۔ اپ سٹریم اور ڈاؤن سٹریم کوفر(عارضی) ڈیمز مکمل ہونے کے بعد مین ڈیم کی فاؤنڈیشن پر کھدا‏ئی کی جارہی ہے جو اسی سال اگست میں مکمل ہو جا‎‎ۓ گی۔ مین ڈیم کیلئےرولر کمپیکٹ کنکریٹ(آر سی سی) ڈالنے کا عمل بھی رواں سال دسمبر میں شروع ہو جا‎‎ۓگا۔ بریفنگ کے دوران بتایا گیا کہ پاور ہاؤس کی کھدائی کا کام جنوری 2026ء میں مکمل ہو گا۔ جبکہ شاہراہ قراقرم-1 فروری 2026ء میں مکمل ہوگی۔ شاہراہ قراقرم-1 25کلومیٹرطویل ہے اوراس میں سات ٹنلز اور تین پل بھی شامل ہیں۔ داسو ہا‏ئیڈرو پاور پراجیکٹ سے بجلی کی پیداوار 2027ء میں شروع ہوگی۔
اس موقع پر گفتگو کرتے ہو‎‎ۓ چئیرمین واپڈا نے کنسلٹنٹس اور کنٹریکٹرز کو ہدایت کی کہ وہ ٹا‏ئم لائنز کے مطابق پراجیکٹ کی تکمیل کے لیے اپنی کوششوں میں تیزی لا‏ئیں۔
دورے کے دوسرے مرحلے میں چئیرمین واپڈا نے مقامی عمائدین کے ساتھ ایک جرگہ میں شرکت کی۔ جرگہ میں از خود آباد کاری پیکج کے تحت ادائیگیوں اور لوکل ایریا ڈویلپمنٹ سکیم پر عمل درآمد بارے تفصیلی بات چیت کی گئی۔ چئیرمین نے کہا کہ واپڈا پراجیکٹ ایریا سے تعلق رکھنے والے لوگوں کی سماجی اوراقتصادی ترقی کے لئے پر عزم ہے۔ اس مقصد کے لیے پراجیکٹ ایریا میں مختلف ترقیاتی سکیموں پر خطیر رقم خرچ کی جا رہی ہے۔ ان ترقیاتی سکیموں میں مقامی افراد کی آباد کاری، ماحو لیاتی انتظام اور علاقے کی معاشرتی ترقی کے منصوبے شامل ہیں۔ چئیرمین نے پراجیکٹ حکام کو ہدایت کی کہ مقامی افراد کے مسائل کے حل کے لئے ان کے ساتھ قریبی رابطہ برقرار رکھیں۔
داسو ہائیڈرو پاور پراجیکٹ کی مجمو‏عی پیداواری صلاحیت 4 ہزار 320 میگا واٹ ہے اور اسے دو مراحل میں مکمل کیا جا رہا ہے۔ اس وقت واپڈا پراجیکٹ کے پہلے مرحلے پر کام کر رہا ہے جس کی پیداواری صلاحیت2 ہزار 160 میگا واٹ ہے اور اس سے نیشنل گرڈ کو سالانہ 12 ارب یونٹ کم لاگت اور ماحول دوست پن بجلی فراہم ہوگی
urdu news, Dasu Hydropower Project, electricity production will begin in 2027