علم، رہنمائی اور اخلاص کا پیکر، زرمینہ بتول اسوہ گرلز کالج سکردو
ہر انسان کی زندگی میں کچھ شخصیات ایسی ضرور آتی ہیں جو نہ صرف اس کے علم میں اضافہ کرتی ہیں، بلکہ اس کی سوچ، کردار اور زندگی کے سفر پر بھی گہرا اثر ڈالتی ہیں۔ میرے لیے استاد الطاف ایسی ہی ایک شخصیت کا نام ہیں — ایک رہنما، ایک محسن، ایک ایسے معلم جن کی شفقت اور علم نے میرے اندر چھپے لفظوں کو زبان دی، سوچوں کو سمت دی، اور خوابوں کو اُڑان۔
الطاف سر کا قد اگرچہ مختصر ہے، لیکن اُن کی شخصیت کا قد اس قدر بلند ہے کہ بڑے بڑے ذہن اور دل اُن کے سامنے جھک جاتے ہیں۔ ان کا سادہ سا حلیہ، گھنی داڑھی، اور پُرسکون چہرہ پہلی نظر میں ہی ان کی متانت اور فہم و فراست کا عکس پیش کرتا ہے۔ وہ ان اساتذہ میں سے ہیں جنہیں دیکھ کر دل میں خودبخود ادب جاگتا ہے، اور بات کرتے ہوئے انسان بے ساختہ نرمی اور تہذیب اختیار کر لیتا ہے۔
فزکس جیسے مشکل مضمون کو پڑھانے کے باوجود، ان کی کلاس کبھی بوجھ محسوس نہیں ہوتی۔ الجھے ہوئے نظریات، پیچیدہ فارمولے اور گنجلک مساواتیں، اُن کے لبوں سے اس انداز میں بیان ہوتی ہیں کہ گویا کہ کوئی کہانی سنائی جا رہی ہو۔ لیکن الطاف سر صرف فزکس کے استاد نہیں ہیں — وہ زندگی کے استاد ہیں۔ ان کی باتوں میں صرف علم نہیں ہوتا، بلکہ وہ حکمت، تجربہ، اور ایک دردمند دل کی جھلک ہوتی ہے۔
ان کی سب سے بڑی خوبی، جو انہیں ہزاروں میں ممتاز بناتی ہے، وہ ہے ان کا “حوصلہ افزا” انداز۔ وہ کبھی کسی غلطی پر طالبعلم کی تضحیک نہیں کرتے، بلکہ نرمی سے سمجھاتے ہیں، راہ دکھاتے ہیں اور حوصلہ بڑھاتے ہیں۔ اُن کی ایک بات آج بھی میرے دل میں نقش ہے:
“غلطی کرنا عیب نہیں، سیکھنے سے انکار کرنا عیب ہے۔”
یہ وہ جملہ تھا جس نے میرے اندر کے خوف کو ختم کیا، اور لکھنے کی ہمت دی۔
وہ صرف پڑھاتے نہیں، بلکہ ہر طالبعلم کے دل میں ایک خاص جگہ بنا لیتے ہیں۔ وہ ہر دل عزیز ہیں — چاہے وہ کلاس کے سب سے ذہین طالبعلم ہو یا کمزور۔ ان کی ذات ایک درخت کی مانند ہے، جو خود دھوپ سہتا ہے مگر اپنے سائے تلے دوسروں کو سکون دیتا ہے۔
ادارے میں ان کی موجودگی ایک نعمت ہے۔ وہ ان لوگوں میں سے ہیں جن کی موجودگی صرف کلاس روم تک محدود نہیں رہتی، بلکہ انسان کی زندگی میں رہتی ہے — ہمیشہ کے لیے۔ ان کی دعائیں، ان کی اصلاح، اور ان کی شفقت میری زندگی کا قیمتی سرمایہ ہیں۔
الطاف سر جیسے استاد صدیوں میں پیدا ہوتے ہیں — اور جو خوش نصیب اُن سے کچھ سیکھ پائے، وہ ہمیشہ ان کے احسان مند رہتے ہیں۔

column in urdu, knowledge, guidance and sincerity,