حمد باری تعالیٰ شاعر:. امیر علی عاشق
حمد باری تعالیٰ
شاعر: امیر علی عاشق
مک نا سمنمہ پہ ژے یانگ دوکسے لے ڑگیاز گو مہ نیمور
سنینگ لاچہ خسمفونوزن گوید نئی کھوقپینگ نو چہ کھور
کاتیبین نی سی چہ ربیسنہ لے اشی گیودپہ مید
یانگ رنے دوکھنہ چھوغید ایونگ سو لا چہ ژور نا رے ژور
یانگ لا گو ڑگیل بیاسے نا دوکسینہ چوق یانگ لا ستودید
نسپہ چن ان نا سی شاقشید نیا بیو یانگ لا بیورید
یانگ لا مہ بڑانگفہ لے ڑگیاز گو اونا یانگ سولا زیروک
یانگ رحیم دوکسینہ عف نالا مبیو یانگ لا می بیور
ملپہ یانگ دوکنہ بجدے خشپو انو ستونگ پہ تھلے
دینے خش یود پی رگہ کھنچہ جورو گہ میول لا ژالے
گیودپنہ ژھر بنہ ژھر کھینگ نو ستورید یانگ بجیدے دوکس
اونا رحمان و رحیم یانگ انی سوا ژھور یا مہ ژھور
اونگمی ژھیو شز دے یری فیقپوبے رینگچن کونی فیا
یری رنبزو ژالے ستروق سکورفی دے سنگچن کونی فیا
چھاڑو ابلیسی زگوکھور تھونگمے مبیوس شزدے یری
یری ہڑگیز گوے کھہ نا عاشق ؔ تا نیلم لا سہ می شور
